SERIKALI KUJA NA TRA MPYA MAALUMU

 

 

SERIKALI inatarajia kuunda Mamlaka Kuu ya Mapato ya Taifa nje ya Mamlaka ya Mapato ya Tanzania (TRA) iliyopo sasa, kuondokana na malalamiko ya kero za kodi kwa wananchi wenye kipato cha chini.

Aidha, TRA imefuta kodi elekezi kwa bidhaa zinazoingizwa nchini kwa msamaha wa kodi hususani zinazotoka China, hivyo wafanyabiashara waliokuwa wakinufaika na fursa hiyo, watatakiwa kuanza kulipa kodi.

Hayo yalielezwa jijini Dar es Salaam jana na Kaimu Kamishna Mkuu wa TRA, Alphayo Kidata alipokuwa akizungumza na waandishi wa habari. Akizungumzia mamlaka mpya itakayoanzishwa, alisema hiyo ni sehemu ya juhudi za Serikali kusaidia wananchi wa kipato cha chini, kumudu kulipa kiwango cha kodi kinachowekwa na mamlaka hiyo.

“Napenda kuwaambia umma wa Watanzania kwamba Serikali ya Awamu ya Tano inawajali watu wake na ndiyo maana imeona kuwa kuna haja ya kuunda mamlaka moja ya utozaji wa kodi itakayojumuisha taasisi zote zinazohusika na kukusanya mapato nje ya kodi na ushuru ili kuondokana na malalamiko mengi ya wananchi juu ya utozaji wa kodi hasa katika halmashauri zetu,” alisema Kidata.

Kamishna Kidata alisema katika dunia, hakuna serikali ambayo imechaguliwa na wananchi ikaamua kuwakandamiza wananchi wake . “Hivyo basi kwa sasa serikali ipo katika mchakato wa kuunda mamlaka hiyo ambayo itasaidia kuweka viwango vya kodi ambavyo wananchi wa hali ya chini watamudu kulipa kutokana na biashara au kazi wanazozifanya,” alisema.

Kamishna huyo alisema mamlaka yake kwa kushirikiana na mamlaka nyingine, zinazokusanya kodi katika halmashauri nchini, watahakikisha wanapatia ufumbuzi kero ya kodi kwa wananchi wa hali ya chini kwa kupata muafaka, ambao utasaidia pande zote mbili bila kukandamiza upande wowote ama Serikali au mwananchi wa kawaida.

Ingawa TRA imekuwa na rekodi nzuri ya ukusanyaji wa kodi, kumekuwa na malalamiko mengi kutoka kwa wananchi kuhusu kodi zinazodaiwa kuwa za kero. Akizungumzia kufutwa kwa kodi elekezi kwa bidhaa zinazoingizwa nchini kwa msamaha wa kodi, Kaimu Kamishna Kidata alisema awali, kulikuwa na punguzo la kodi kwa wafanyabiashara wanaoagiza na kuingiza bidhaa kutoka China kwa kupunguziwa sehemu ya kodi.

“Tumeamua kuondoa kodi elekezi kwa sababu haina faida kwa taifa letu kwani inawanyima wafanyabiashara wengine ambao hawaagizi bidhaa kutoka China, fursa ya kushindana kibiashara.

 

chanzo>mtembezi

Share on Google Plus

News Point inakusogezea habari kubwa za kila siku kutoka kila kona ya dunia. Ungana nasi kupitia Facebook , Twitter na Instagaram ili uwe wa kwanza kupata habari.