Wananchi Singida watakiwa kushiriki utekelezaji wa Mradi wa Master Plan

Kaimu Mkuu wa Mkoa wa Singida, Said Amanzi, amewataka wakazi wa mji wa Singida kutoa ushirikiano katika utekelezaji wa mradi Kamambe wa uendelezaji wa mji ili uweze kubadilika muonekano na kiuchumi pia.

Mradi huo unafadhiliwa na benki ya dunia (WB) kwa gharama ya zaidi ya shilingi Bilioni 6.1.

Amanzi ambaye ni mkuu wa wilaya ya Singida, ametoa wito huo juzi wakati akizungumza kwenye ufunguzi wa mkutano wa wadau wa mpango kamambe (master plan) wa maandalizi ya kupokea mpango ulioandaliwa kwa ajili ya dira ya maendeleo ya mji wa Singida, kwa kipindi cha miaka 20 kuanzia mwaka huu hadi 2036.

Alisema uzoefu unaonyesha kuwa baadhi ya wakazi wa mji na Manispaa ya Singida kwa ujumla, wamekuwa wakizuia bila sababu za msingi wawekezaji kuwekeza katika maeneo ya ardhi yaliyowazi kwa madai kwamba ni mali ya ukoo wao.

“Ndugu zangu wakazi wa mji wa Singida na manispaa kwa ujumla, nawasihi acheni tabia ya umwinyi … msing’ang’anie ardhi ambayo hamuwezi kuiendeleza. Na acheni misimamo hasi, misimamo ya aina hii itadumaza kabisa maendeleo ya mji wetu,” alisema.

Kaimu mkuu huyo wa mkoa,amewataka wawe na mitizamo chanya na pia watoe ushirikiano wa dhati katika kutekeleza mradi wa uendelezaji wa mji wa Singida,ili mji uweze kuvutia kwa sura na kuinua uchumi wake.

Awali haimu mkurugenzi wa manispaa ya Singida,Deus Lusiga,alitaja baadhi ya shughuli za mipango ya uendeshaji wa mji wa Singida, kuwa ni kusimamia na kuongoza uendeshaji wa mji na kudhibiti ukuaji wa mji na ujenzi holela.

“Pia ni kupanga maeneo ya matumizi mbali mbali yakiwemo makazi, viwanda, biashara, taasisi, miundombinu ya huduma za kijamii na maeneo ya uwekezaji. Vile vile tunadhibiti uharibifu wa mazingira na kutangaza fursa na vivutio vya kiutalii,” alisema Lusiga.

Aidha, alitaja malengo makubwa ya mpango huo kamambe ni uhimizaji wa mji kuwa pamoja na usiotawanyika, mji ulio kamilifu wenyewe na mazingira yanayouzunguka na kuwa endelevu na kuzingatia mabadiliko ya tabia nchi.

“Nia ya mpango huu ni kuwa na barabara na mitaa yenye ukumbwa wa kutosha kwa ajili ya usafiri na usafirishaji, matumizi ya ardhi yaliyopangwa na kujitosheleza na huduma zilizoboreshwa za kuiwezesha jamii kuishi vizuri,” alifafanua.

Halmashauri ya Singida, ni moja kati ya halmashauri 18 nchini zinazonufaika na mradi wa uendeshaji wa miji unaofadhiliwa na benki ya dunia (WB).Halmashauri zingine ni Babati, Geita, Bariadi, Musoma, Bukoba, Shinyanga, Tabora, Sumbawanga, Mpanda, Songea, Moshi, Lindi, Kibaha, Morogoro, Korongwe, Iringa na Njombe.

Na Nathaniel Limu

Ramani ya master plan ya mji wa Singida kwa kipindi cha miaka 20 kuanzia mwaka huu hadi 2036.

Bango la mkutano wa wadau wa mpango wa miaka 20 wa mji wa Singida.

Baadhi ya wajumbe wa mkutano wa wadau wa mpango kamambe (master plan) kwa maandalizi ya kupokea mpango ulioandaliwa kwa ajili ya dira ya maendeleo ya mji wa Singida kwa kipindi cha miaka 20 kati ya 2016 hadi 2036.Mkutano huo ulifanyika kwenye ukumbi wa mikutano wa VETA mjini hapa.

Kaimu Mkurugenzi Manispaa ya Singida, Deus Lusiga, akitoa taarifa yake kwenye mkutano wa wadau wa mpango kamambe (master plan) kwa maandalizi ya kupokea mpango ulioandaliwa kwa ajili ya dira ya maendeleo ya mji wa Singida kwa kipindi cha miaka 20 kati ya 2016 hadi 2036.Mkutano huo ulifanyika kwenye ukumbi wa mikutano wa VETA mjini hapa.Wa pili kushoto ni kaimu mkuu wa mkoa wa Singida, Saidi Amanzi na watatu kushoto ni mstahiki meya manispaa ya Singida, Chima Gwae. Kushoto ni mwenyekiti wa mkutano huo, Shaban Mwanja.

News Point inakusogezea habari kubwa za kila siku kutoka kila kona ya dunia. Ungana nasi kupitia Facebook , Twitter na Instagaram ili uwe wa kwanza kupata habari.